عيون الوطن
كلمات عبد الرحمن الابنودي
الحان هيثم توفيق
توزيع احمد شعتوت
كلمات الاغنيه
إرسمها ع الجدران وع البيبان
وانقشها على ورق الشجر فى الريف
إروى عطش كل اللى بات عطشان
وادفع تَمن ما اخترت تبقى شريف!!
بيكسروا اياديك يا ابن الناس
علشان تكف عن افتضاح الأمر
لِمّ الفُرَشْ.. وطبَّق الكرَّاس
واقعد فى ضل الصبر.. من غير صبر!!
الشهدا سايبين ضلهم ع الأرض
ووشوشهم المرميه في الطرقات
ماضيين على الدم النبيل.. باليد.
الدم صاحى.. فمين بقى اللى مات؟
من كل فج الزحف بالملايين
ضد اللى خان فى السرّ أحلامهم
إحنا العدا.. ومافيش عِدا تانيين
دول خُبرا بس فى قتل أوطانهم!!
ياما شبْعت الزنازين من صوتنا
- والسجانين صُبيان للسلاطين
احنا انتصرنا.. لما هان موتْنا
جيش مين حيغلب صرخة الملايين؟
يا الشاعر اللى كسّروا حلقُه
بيدوّروا ع النار وع البارود
قتلوك بحقد ومزّعوا وخنقوا
والصوت مازال وسط الجموع بيقود!!.
فِدا النِّدا.. بقيت شهيد الثورة
صوتك عبرها.. مدينه بعد مدينة
مازال يعكَّر فى الوشوش العِكرة
صوتك.. وبينوّر وشوش أهالينا!!
ياما شبْعت الزنازين من صوتنا
- والسجانين صُبيان للسلاطين -
احنا انتصرنا.. لما هان موتْنا
جيش مين حيغلب صرخة الملايين؟
للتحميل
عيون الوطن
للاستماع
0 التعليقات:
إرسال تعليق